Rossalitir

 Niðan fyri er leysliga greitt frá hvussu vit greina litirnar á rossum.

Brúnt	Einans um tagl og faks í høvuðsheitum er svart og rossið annars er brúnt. Skilt verður millum td. dimmbrúnt ella myrkabrúnt, grábrúnt og ljósabrúnt.
Svart	Kroppur, tagl og faks skulu vera svørt . Harumframt skal húðin um nasar, munn, eygu og kynsgøgn vera svørt.
Reytt	Skilt verður millum t.d. dimmreytt ella myrkt reytt, reytt og ljóst reytt. Faks og tagl eru ikki svørt. Liturin á faksi og tagli skal viðmerkjast eftir høvuðslitin.  Til dømis: Reyð ryssa við hvítum faksi og tagli.
Gult	Skilt verður millum td. dimm ella myrkt gult, gult og ljóst gult. Ál er navnið á myrku strípuni, ið ofta sæst eftir rygginum á (gulum) rossum.
Skjórut	Samanleypandi ljósir og myrkir blettir. Skilt verður til dømis millum morr-, blá-, reyð-, og gráskjórut ross.
Grátt	Hava eins og gul ross ofta ál. Skilt verður millum til dømis dimm-, morr-, blá-, og ljósgrá ross.
Hvítt og ljóst	Skjórut ross kunnu blíva hvít ella ljós, tá tey verða eldri. Í einstøkum førum kunnu ross vera litloysingar (albino).
Flekkut	Um rossið hevur stórar, vælavmarkaðar  hvítar og litaðar blettir, verður tað rópt flekkut. Litaðu blettirnir avgera litin. Til dømis: gráflekkut, svartflekkut o.s.fr.